2014/2015 تغييرات جذرية وحياة مختلفة

 

 

 

 

 

 

 

 

 

 

 

 

 

 

 

 

تدوينة مختلفة عن غيرها

اخذت فيها اسبوعين قبل انزلها

بصراحه كانت شي وصارت شي ثاني ..

كنت بنزل عن مواقف واشياء وحياة 2014

فجاة دخلت الوظيفه وسألتوني كثير عنها

فقررت اكتبها هنا معها

وبنات اقترحو عن يوميات اول اسبوع دوام وحبيت الفكرة وبديت اكتبها

اذا ماتهمك هالمواضيع قفلي المدونه لان مافيه شي يخص الميك اب او العناية

مجرد حياتي واشياء مريت فيها وقررت اكتبها هنا

 

 

 

 

 

 

 

 

يوم االخميس حاليا الساعه 1 و31 دقيقه مساء او فجر او ايا كان
صوت القران يجيني بشكل هادي وخافت من الصاله ..
الشباك مفتوح يدخل منه ريحه الحطب واللليل البارد ..
اول يوم في السنه الجديده
هالشي خلاني افكر ايش صار لي السنه الي راحت..
ومااتذكرت اي انجاز سويته او يمكن سويته ومااعطيته حقة في التقدير ومااعطيت نفسي الشكر والراحه الي تحتاجها بعد تعب انجاز وتحقيق هدف..
كثير افكر هل يحسب عمرنا بالايام والسنين الي نعيشها او بالاشياء الي ننجزها ونتذكرها فيها؟؟

2014 اكثر مايميزها اني مانجرحت مازعلت مانكسرت ومافقدت احد ..
على مر السنين خسرت ناس وغابو عن حياتي ناس وكنت في صراع دائم مع نفسي واني مو راضيه عن حياتي ..
هالسنه فرحت وانبسطت انها كانت هادية ومسالمه ..
مازعلت على عدم الانجاز قد مافرحت بعدم الفشل والخسارة ..
 هالسنه اتخرجت ..
شهادة بكالوريوس في اللغة الانجليزية ..
الاجمل انها مو مجرد ورقة بالنسبه لي..
كان نمط حياة وثقافه ولغة اكتسبتها وفخورة فيها ..
في المقابل اتذكر اني اتخرجت بدون تكوين اي علاقات او صداقات بحكم البنات الي عكس حياتي وعكس مزاجي وكل مافيني ..
احيانا اتمنى اني عشت تجربة الجامعة والصحبات والفله ..
واحيانا اتحمد ربي اني خلصت وانتهيت واتخرجت من مكان كنت اشوفه دون مني دائما ..
برضو هالسنه اخذت شهادة ثانية غير البكالوريوس..
دخلت لمعهد حاسب واخذت دبلوم ..
في هالمجالين كنت ممتازة وشاطرة ومازلت بس كنت ابغاها عالورق ..
مافيه اي مقابله او وظيفة بيسالونك انت شاطر في ايش؟؟
شهادتك هي الي ببتتكلم عنك ..
والحمد الله اخذتها بعد 3 اشهر دراسه وبعد شهرين ممن تخرجي من الجامعه ..
كانت صعبه بحكم اني في بيت غير بيت ابوي وعند ناس غريبه وجو غريب ..
كان صعب بس وحتى تحت الضغط الحمد الله اخذت الشهادة بامتياز ونفعتني كثير الحمدالله وماابالغ ان قلت اكثر من البكالوريوس

 

 

 

 

 

 

 

 

 

في بالي كان خطه او طريق ابغى امشيه
كنت ابغى اقدم في وظيفة في البنك ..
وبهالشهادتين وشكل مرتب وثقه بالنفس راح اتوظف وكان عندي ايمان كبير بهالشي ..
ورحت وقدمت على بنوك ..
وبعد ماكلموني ولاسباب كثيره ماقدرت اوافق على العمل معهم ..
وبعدها بشهور كلمني البنك الثاني واضطريت ارفض للمرة الثانيه..
كنت متنرفزة وزعلانه وحاقده على كل شي وعلى نفسي اني فوت الفرصه وخصوصا ان الرواتب كانت مغريه ..

 

 

 

 

 

 

 

 

 

 

 

 

 

 

 

 

مع الوقت اتضح لي اشياء كثيره وبديت اقتنع ان القرار الي اتخذته كان صحيح
ساعات العمل المجهود والاختلاط كانت اشياء تنافي الاشياء الي ابغاها ومااعتقد كان عندي استعداد اني اسمعها من احد لحد ماسئلت مديرة البنك الي كلمتني وهي اكدتلي ان كل شي قلتلها اخاف منه او ماابغاه موجود ..
اختلاط ,كميرات , ساعات عمل , تقييم سنوي من قبل رجال, هالاشياء كلها ماتتوافق مع وضعي وتربيتي..
وبديت ادور في مجال ثاني ..
مجال امن وتقليدي رغم اني دائما ضد الافكار والحياة التقليديه ..
دائما اقول لنفسي اني ذكية واحتاج فرصه صغيرة عشان اطلع العبقرية الصغيرة الي داخلي ..
كنت احتاج ايمان شخص معين فيني ..
شخص يقدر يفتحلي الابواب ويوقف معي ..
للاسف الوحيده الي كانت دائما تدعمني وتشوف فيني مستقبل كانت امي الله يرحمها ..
هالشي فقدته بشكل ماكنت اتخيل انه يهمني ...
احنا كبنات وخصوصا اذا مو متزوجة تبقين تحتاجين امك كثير ...

 

 

 

 

 

 

 

 

 

 

ماعلينا من هذا الكلام كله ..
الي ابغى اقولة مهما مريت بظروف صعبه هالظروف انبتت فيني اشياء ماكنت اعرف انها موجودة ..
عدلت اهدافي ..
تعلمت ان فيه طرق كثيرة مو شرط الي الطريق الي اخترته هو الي يناسبني .
وان غيري ممكن يفيدني ويعرفني اكثر من نفسسي..

ماكنت اعرف ان فيني ثقه بنفسي تخليني اواجه تجمعات الكبيرة الي تصير عند الاهل والجمعات لحالي ..
ماكنت اتخيل اني راح اغسل يدي من الناس الي يحاولون يجرحوني او يقللون من ثقتي بنفسي ..
تعلمت هالسنه ان الانسان وان كان سعيد ومبسوط فهو محسود على ابتسامته وضحكته ...
وان الناس القريبه منك ماهو شرط قريبه لقلبك ..
واكثر شي جلس في بالي كان كلمه وحده من اخواتي بعد ليله من تعب قولون وكان عندنا ضيوف وخبصه وجمعة عيد ..
قالتلي : خلي اعدائك يشوفونك باحسن حال .. حتى وان كنتي باأسوءه ..
تعلمت اتنازل عن اشياء عادية وطبيعيه عشان مايهتز المركب ..
اتعلمت ان الدنيا ماهي انا بس ومزاجي ..
وتعلمت ان كل الدلع الي كانت امي توفرة لي وكنت اشوفة من حقوقي ماعاد بلقاه ..
لازم اتكلم اذا احتاج لازم اكافح اذا ابغى انجح ولازم اسكت عشان ماحد يشمت ..
انك تواجهين حياتك كامله بددون الثقه بدعاء امك  شي يغير موازين حياتك ...
بس يبقى باب الدعاء لنفسك مفتوح دائما ..

تعلمت ان ماحد يقدر يسعدني مثل مااسعد نفسي ..
تعلمت اني اقدر اخلق من ولاشي شي وانجح فيه
تعلمت اني اوقف اي تفكير سلبي بان عمري وذكائي يروح بين اربع جدران واني طموحه ..
تعلمت اتقبل الظروف مااحاربها وانقم على نعمي عشان ماانحرم منها ..
تعلمت الاستقلال المادي ..
شي جميل ان يكونلك دخل ثابت ماحد له الفضل فيه ..
تعلمت ان اخلق لي هواية ومنها جاء التصوير ..

 

 

 

 

 

 

اشتريت اول كاميرا احترافيه لي وكانت هدية بتاريخ 1 نوفمبر ..
ماانساها ابدا ..
مازلت اتعلم وبالنسبه لي شي جديد مااعرفة يعني تحدي يشغل بالي وعقلي ولازم اتقنه ..
ومازلت لحد الحين اتمنى اتقنه اكثر واكثر واكثر ..

بديت مدونتي هنا ..
كان ومازال الجمال الي فيها انها شي خاص فيني بيبقى موجود مهما كان ..
مو مثل الانستقرام ..
هنا مساحه خاصه رايقه بعيده عن اللايكات وقروشه التعليقات ..
هنا اكتب بحرية ..
هنا القى نفسي ..
قريت مره في كتاب :
لماذا تكتب ؟
اكتب لكي اتنفس فالكتابة رئة ثالث تساعدني على عيش حياة مؤرقة ..

بالنسبة للكتب قريت كثير بس مو كثر ماابغى واحب ..
اقرا لاني احب اوسع لغتي احب القى الفاظ جديده وافكار جديده ومشاعر جديدة ..
احس الناس والشخصيات الي في الكتب هي شخصيات مرت في حياتي مثل صحبات او صديقات تركو فيني اثر وراحو ..
بس الجميل في الكتب انك ماتتوقعين اي شي من هالشخصيات مجرد اتسليتي وعلمتك درس وعشتي حاله جديده غير عن روتين مشاعرك المكرره ...

 

 

 

 

 

 

 

تعلمت اطور نفسي في نفسي ..
عنايتي وحياتي وروتيني ..
كنت اتضايق اذا سهرت واختبص نومي ..
الحين صار الوضع عادي عندي اعرف اني بعدين بتمنى هالفضاوة الي انا فيها ..
مهما كنتي مقتنعه اكيد بتجيك لحظه او يوم او ليله تحسين فيها ان روتينك خانقك وانك تدورين في دائرة مفرغة وان مافية امل في نهاية هالطريق ..
شي طبيعي اعطي نفسك حقها واتركيها تحس باللي تبغاه ..
لكن استعيني على نفسك بالله ومااراح تطول هالحال ...
تعلمت الاشياء البسيطه الي تسعدني مثل كريم احطه بعد شور دافي طويل في ليله متعبه ..
او فيديو يوتيوب اتابعه مع حليب زنجبيل ..
او صوت اختي الكبيره وهي جايتنا مع بنوتاتها الصغار ..
التفاصيل الصغيرة تسعدني اكثر من اي شي ثاني ..

انشئت حساب في الانستقرام تعرفت عليه على بنات كثير وحسيت ان وجودي مهم للبعض ..
تعلمت من بعض الردود اني انسانه كويسة من داخل لان كثير اشياء اسويها بشكل عفوي تلقى صدى في قلوب الكثير ..
حسيت لي كياني وفيه شي اسويه وبصراحه ماادري ايش كان سويت بدون حسابي في الانستا ..

 

 

 

 

 

 

 

 

 

واليوم جاني خبر وظيفتي معلمة لمرحلة الابتدائي ..
الحمد الله كيف فرحت فيها صح تعب لما داومت نصابي في الحصص كبير وفل يعني تقريبا من اول حصه ل6 حصه فل ماعادا يوم واحد في الاسبوع
 لكن انا انسانه احب انجز واحب احلل راتبي وطلعتي وقومتي الصباح
تخصصي لغة انجليزية وعندي دبلوم حاسب فبعلم هالمادتين ان شاء الله ..
بيئة العمل حلوة ومرتاحه الحمدالله ..
المديرة عسل ومتفاهمه بس صارمه في القوانين وانا انسانه احب اتبع القوانين فمااعتقد بواجه اي مشكله ان شاء الله ....
هي مدرسه اهلية فاضطريت اني انا اسعى واسعى لهم ..
مو اجلس وانتظر لحد ينادوني ..
مجال القطاع الخاص متعب بس يعطيك فرصه تحققين نفسك وتبدعين ..
يعني يبان معدنك ومجهودك وتشوفين نتيجه سواء تمديد عقد او علاوة رواتب او اي شي ..
المدارس الاهليه الي في منطقتك ادخلي لحسابها في تويتر او انستقرام
كذذا عرفت عن فرص العمل وحتى هم مااعلنو انا سالتهم في حسابهم اذا عندهم احتياج وقالو ايوه تعالي ..
سويلك تويتر واضيفي الصحف تبع الوظائف ..
صدقيني صدقيني بتشوفين ان الفرص كثيره ومتنوعه
بالنسبه للبنك انا قد طلبوني ومارضيت بسبب الاختلاط مثل ماقلت ..

كيف تقدمين عليهم ؟
اكشخي جديا اكشخي حطي ميك اب البسي عبايه مرتبه جهزي نفسك واخر شي اوراقك
اذا عند اي شهاده حاسب بياخذونك
ولاتاخذين موعد او اي شي
اطلبي المديرة وادخلي انا سويتها في بنكين وكلهم رضيو وطلبوني
حاليا دامنا في بداية سنه البنوك تدور تدور على موظفات فجربي حظك
برضو طاقات انتو عارفين انهم يوظفون؟
جديا يوظفون ..
ادخلي وابحثي عن وظيفة في منطقتك بس تكونين مسجله في حافز وهم بيحولون لك على صفحه حافز تسجلين دخول ..
السي في ماخذينه من حافز فبيدورون لك وظيفة تناسب شهادتك..
واخيرا ادعي دايما ..
صلي ركعتين حمد وشكر في كل ليله وادعي ..
الحمدالله هالشي فادني كثير كثير كثير كثير..
ولاتسمعين لاحد لاتشوفين انهم يقولون انك فاشلة او انك تاخرتي او اي شي..
واهم شي مهما صار وقالولك تعالي لوظيفة ..
لاتقولين شي لاي احد ..
تممي امورك وبعدها خبري الي تبغين
سبحان الله كيف تتيسر اذا ماحد حاط عينه عالشي الي بيدك ...
وباول يوم اتحققت امنيتي ..
عقبال كل الاحلام والامنيات ...

 

 

 

 

 

 

 

 

 

 

 

يوميات الدوام

 

 

 

 

 

 

 

 

 

 

 

 

اول ايام داومت فيها كانت الله لايوريكم

انا بطبعي منغلقه ومااحب اختلط مع الناس

وكان فيه حفل بما انهم انتهو من الدراسه وتلقين البنات يتكلمون مع بعض وانتي منبوذه

في البداية لي مكتبي الخاص الحمدالله يعني مو مضطره احس اني مجبورة اتكلم معهم او احس اني دخيله

لما جات هالحفله ماعرفت اتصرف ابدا

ودخلت مكتبي جلست اتكلم معكم علاانستا والسناب

ماارتحت ابدا ورجعت البيت بكيت بكيت لحد قلت بس

وداومت من بكرة كرفت نفسي عشان ماافكر

خلصت اوراقي ورتبت مكتبي حتى المديرة استغربت اني خلصت بدري

احب اعمل وانتج كثير وارتاح نفسيا اذا تعبت

اشتريت الاشياء الي ابغاها

اخذت غلايه اسويلي شي ساخن في اي وقت

وجبت علب حطيت فيها شاهي ووسكر واشياء ثانية

جبت فواحتي وطابعه خاصه فيني

واوراقي ونوتاتواحتياط ميك اب وحتى ديودرنت او مزيل عرق حطيت

وجبت سجادتي على اساس اصلي هناك ورحت باللاب حقي ووصرت الاوقات الي فاضيه فيها اتابع مسلسل احبه

او اشيك نت او اي شي

خليت المكتب غرفه ثانيه لي

 

 

 

وبسسس

ان شاء الله انكم غيرتو جو على هالبوست وجاوبت اسئلتكم